Noticia
E caminata a bira un exito redondo. 672 participante cu nanishi cora a disfruta di un atardi inolvidable. Danki na tur nos sponsor y boluntarionan, pasobra nan esfuerso a logra cu e evento a bira un exito.
Workshop
Differente biaha e clowndoctors a bay scol bek pa un workshop na Colegio Arubano, cu a wordu duna door di Phil Mann, specialista den mimiek.
Phil, naci na e parte Noord di Inglatera pero ta biba na Nieuw Zeeland, a cuminsa cu e wowonan i despues a sinja nan pa relaha e cara pa despues tambe duna atenshon na henter e curpa. Increibel con cu solamente un par di movishon simple bo por crea diferente sentido y attitud.
Payasonon di Aruba ta hari y yora na Belgica
Luna pasa 5 payaso di Fundacion "Clown Dokters Aruba", a biaha pa Belgica riba invitacion di Cliniclowns di Belgica pa un curso di un siman. Madrina di Clown Dokters Aruba, Rona Coster a companja nan riba e viaje huntu ku miembronan di directiva Peter Balliere y Heleen Bongers.
Proposito di e viaje tabata pa sinja y probecha di e experiencia di e payasonan Belgica lo mas possible. Ta mas ku dies anja kaba nan ta bishita hospitalnan y hopi nan por sinja nos payasonan. Tin biaha tabata dificil pa controla emocionan especialmente durante e bishitanan na hospital di mucha ku ta sufri di cancer. E experiencianan aki a duna nan hopi mas gana di mehora nan abilidadnan.
Sentimentonan hopi profundo y intenso ta surgi ora e payaso hasi su traboa ku muchanan ku ta sufri di un malesa y ta requeri un amor fuerte di e payaso pa ku su trabao. Pero e reaccion di e mucha ta duna un satisfacion tremendo y un deseo pa duna mas.
Nos payasonan a logra di establece un enlace fuerte ku e payasonan di Belgica y den nan mes grupo provechando un ambiente hopi dushi ku e bunita ciudad di Antwerpen ta ofrese. E dedicacion y intensidad ku nos payasonan a mustra sigur lo duna su frutanan den nan actuacionan aki na Aruba. Un siman di traboa duro pero tambe ku hopi satisfacion.
